Sapardyń mańyzdy oqıǵalarynyń biri – Rahat aýylynda 1200 oryndyq №25 jańa mekteptiń ashylýy. Bilim oshaǵy Prezıdent Qasym-Jomart Toqaevtyń bastamasymen júzege asyrylyp jatqan «Keleshek mektepteri» ulttyq jobasy aıasynda salyndy. Mektep 61 arnaıy kabınetimen jabdyqtalǵan, onyń ishinde STEM zerthanalary, robototehnıka, dızaın jáne tehnologııa, mádenıet jáne óner, tamaqtaný mádenıeti, ınklıýzıvti bilim berý kabınetteri bar.
Jedel medısınalyq kómektiń materıaldyq-tehnıkalyq bazasyn nyǵaıtý maqsatynda oblys ákimi Jańaózen qalalyq jedel járdem stansııasyna zamanaýı medısınalyq quraldarmen jabdyqtalǵan bes jańa Hyundai Staria avtokóligin tabystady. Bul jedel kómektiń sapasy men tıimdiligin arttyrýǵa múmkindik beredi.
Nurdáýlet Qılybaı sapar aıasynda óńirdegi iri áleýmettik jobalardyń júzege asyrylý barysymen de tanysty. Ol 350 balaǵa arnalǵan qosymsha bilim berý ortalyǵy sanalatyn «Bolashaq Saraiy» oqýshylar ortalyǵy ǵımaratynyń qurylysyn aralady. Ortalyqta zerthanalar, IT-synyptar, telestýdııa, shyǵarmashylyq sheberhanalar, akt zaly jáne kovorkıng aımaqtary qarastyrylǵan. Ákim nysandy belgilengen merzimde aıaqtaýdy tapsyrdy.
Sonymen qatar, oblys ákimi jyl basynda ashylǵan kópfýnksıonaldy «Muz aıdyny» sport kesheniniń jumysyn baǵalady. Muz arenasy óńirde qysqy sport túrlerin damytýǵa aıtarlyqtaı serpin berdi. Munda hokkeı, mánerlep syrǵanaý, short-trek jáne kerlıng seksııalary jumys isteıdi, sondaı-aq jattyǵý prosesine qajetti ınfraqurylym tolyq qamtamasyz etilgen.
Áleýmettik nysandardy aralaǵannan keıin Nurdáýlet Qılybaı múmkindigi shekteýli azamattardyń úılerine baryp, olardyń talap-tilekterin tyńdady. Jaýapty memlekettik organdarǵa qoljetimdi orta qurý, azamattardyń suranysy boıynsha tómengi qabattarǵa kóshirý máselesin sheshý jáne ınvataksı qyzmetin keńeıtý boıynsha tapsyrmalar berdi.
Osydan keıin aımaq basshysy Kendirli aýylynda jergilikti ózin-ózi basqarýdy nyǵaıtý maqsatynda salynǵan jańa aýyldyq ákimdik ǵımaratynyń ashylýyna qatysty. Sonymen qatar Kendirli, Qyzylsaı, Teńge jáne Rahat aýyldyq okrýgterine qyzmettik avtokólikter tabystaldy. Bul aýyldyq ákimdikterdiń jumys tıimdiligin arttyrýǵa múmkindik beredi.
Sapar sońynda oblys ákimi Jańaózende alǵash ret uıymdastyrylǵan dzıýdodan jastar arasyndaǵy Qazaqstan chempıonatynyń ashylý rásimine qatysty. Jarysqa elimizdiń barlyq óńirinen 600-den astam sportshy jınaldy. Nurdáýlet Qılybaı óz sózinde Prezıdent tapsyrmasyna sáıkes óńirde buqaralyq jáne jasóspirimder sportyna erekshe kóńil bólinip, zamanaýı sport ınfraqurylymy júıeli túrde damyp jatqanyn atap ótti.
Jumys sapary Jańaózen men aýyldyq okrýgterdiń áleýmettik salasyn damytýǵa tyń serpin berip, turǵyndardyń ómir sapasyna áser etetin ózekti máselelerdiń sheshilýine yqpal etti.
